各位警務處嘅同事：

我係早前十月一日受傷的屯門反黑同事，首先我想係度報個平安先，我冇大礙！事源當日我係屯門便衣當值，其間係屯門大會堂外制服一名被捕示威者時，被裝有腐蝕性液體嘅水槍射中，導致背部一部分及右手手臂內側嚴重灼傷（第三級燒傷）。我相信大家都已經係唔同群組睇過我受傷嘅相。事實上，我係受傷當日，已經打左八支嗎啡止痛，可想而知我受嘅傷比大家睇到嘅相嚴重得多……醫生雖然同我講我冇生命危險，但我右手神經死哂，需要做兩至三次手術，同埋留醫一段長時間。十月二日我已完成第一次清創手術，我黎緊仲要再做兩至三次植皮手術，然後需要一段時間休養同進行復康過程。

我想同各位同事講，雖然我今次受左好嚴重嘅傷，但我冇後悔加入警隊，亦唔會因為今次受傷而退縮！我加入警隊已經十三年，我知道今次嘅受傷係我警務生涯最大嘅挑戰之一，但我會一如既往去面對。縱使我知道黎緊要面對漫長嘅復康過程，但傷患唔會將我擊倒，我會盡快康復，變得比以前更強！

各位，我可能有一段時間唔可以同大家並肩作戰，但我嘅心會繼續支持大家！呢段咁困難嘅時間，我地做到嘅野可能好有限，但大家一定要小心保護自己，工作時戴足夠嘅保護裝備，我唔希望再有任何同事受傷。同樣，不論身分立場，每一個人嘅安全性命同樣重要，我希望大家無論係呢段期間有幾辛苦，幾難捱，都繼續以我地嘅專業精神，以公正無私嘅態度執法，唔好忘記我地警察嘅身分，令我地可以繼續以作為警察為榮。

另外，我都好想藉此機會向專業的醫護人員表示謝意。在我接受治療期間，威爾斯親王醫院嘅醫生、護士同其他醫護人員都非常專業，佢地對我作出非常悉心嘅照顧、詳細解釋我嘅情況同傷勢。我對佢地嘅專業精神深受感動，我衷心感激每一位曾經照顧過我嘅醫護人員。

最後好多謝我受傷期間一直幫手嘅福利部同事，我嘅上級，我嘅同隊，多謝！

● 只有中文版