各位警务处嘅同事：

我系早前十月一日受伤的屯门反黑同事，首先我想系度报个平安先，我冇大碍！事源当日我系屯门便衣当值，其间系屯门大会堂外制服一名被捕示威者时，被装有腐蚀性液体嘅水枪射中，导致背部一部分及右手手臂内侧严重灼伤（第三级烧伤）。我相信大家都已经系唔同群组睇过我受伤嘅相。事实上，我系受伤当日，已经打左八支吗啡止痛，可想而知我受嘅伤比大家睇到嘅相严重得多……医生虽然同我讲我冇生命危险，但我右手神经死哂，需要做两至三次手术，同埋留医一段长时间。十月二日我已完成第一次清创手术，我黎紧仲要再做两至三次植皮手术，然后需要一段时间休养同进行复康过程。

我想同各位同事讲，虽然我今次受左好严重嘅伤，但我冇后悔加入警队，亦唔会因为今次受伤而退缩！我加入警队已经十三年，我知道今次嘅受伤系我警务生涯最大嘅挑战之一，但我会一如既往去面对。纵使我知道黎紧要面对漫长嘅复康过程，但伤患唔会将我击倒，我会尽快康复，变得比以前更强！

各位，我可能有一段时间唔可以同大家并肩作战，但我嘅心会继续支持大家！呢段咁困难嘅时间，我地做到嘅野可能好有限，但大家一定要小心保护自己，工作时戴足够嘅保护装备，我唔希望再有任何同事受伤。同样，不论身分立场，每一个人嘅安全性命同样重要，我希望大家无论系呢段期间有几辛苦，几难捱，都继续以我地嘅专业精神，以公正无私嘅态度执法，唔好忘记我地警察嘅身分，令我地可以继续以作为警察为荣。

另外，我都好想藉此机会向专业的医护人员表示谢意。在我接受治疗期间，威尔斯亲王医院嘅医生、护士同其他医护人员都非常专业，佢地对我作出非常悉心嘅照顾、详细解释我嘅情况同伤势。我对佢地嘅专业精神深受感动，我衷心感激每一位曾经照顾过我嘅医护人员。

最后好多谢我受伤期间一直帮手嘅福利部同事，我嘅上级，我嘅同队，多谢！